Home / Business / चितवनको माधवपुरमा एकै व्यक्तिका ३ हजार ७ सय कुखुरा मरे,बर्ड फ्लूको आशंका

चितवनको माधवपुरमा एकै व्यक्तिका ३ हजार ७ सय कुखुरा मरे,बर्ड फ्लूको आशंका

चितवन,चैत २२- चितवनको रत्ननगर १५ माधवपुरको एक कुखुरा फर्ममा हप्ता दिनमा ३ हजार ७ सय कुखुरा मरेको छ । लामिछाने पोल्ट्री फर्मको ४ वटा खोरका कुखुरा अचानक मर्न थालेपछि बर्ड फ्लूको आशंका गरिएको छ । कुखुरा धमाधम मरेकाले बर्ड फ्लूको आशंका गरिएको लामिछाने पोल्ट्री फर्मका सञ्चालक अमृत लामिछानेले बताए । द्रोण प्रसाद लामिछानेको नाममा दर्ता भएको फर्मको रेखदेख र कारोबार उनका कान्छा भाइ अमृत लामिछानेले गर्दै आएका छन् । विगत ८ वर्षदेखि कुखुरा पाल्दै आएका लामिछानेको फर्ममा पहिलोपटक यति ठूलो समस्या देखिएको हो । फर्ममा लेयर्स कुखुरा मरेको थाहा पाएपछि आज (बिहिबार) दिउसो १ बजे जिल्ला पशु सेवा कार्यालय चितवनका प्रमुख चेतनारायण खरेल र पशु चिकित्सक डा. विकाश श्रेष्ठले स्थलगत निरिक्षण गरेका छन् । खोरको अनुगमन पछि कार्यालयका प्रमुख खरेलले छोटो समयमा यति धेरै कुखुरा मर्नुले बर्ड फ्लूको आशंका भएको वताए । तर ल्याब परिक्षणको रिपोर्ट नआई यसै भन्न नसकिने उनले जानकारी दिए । पशु चिकित्सक डा.। विकाश श्रेष्ठले बर्ड फ्लूको आशंका भएको तर रिपोर्ट आएपछि मात्र यथार्थ भन्न सकिने प्रतिकृया दिए ।

यसरी फैलियो रोग

गत चैत्र १५ गते बेलुका हावाहुरी आएपछि साँझ ३ वटा कुखुरा मरेको सञ्चालक अमृत लामिछानेले बताए । त्यसैको भोलिपल्ट बिहान खोरमा १४ वटा कुखुरा मरेको देखेपछि उनले काम विशेषले काठमाडौं गएका दाइ द्रोण लामिछानेलाई फोन गरे । दाइको सल्लाह अनुसार उनि कुखुराको रोग परीक्षणको लागि भरतपुर पुगे । १६ गतेको पशु सेवा कार्यालयको रिपोर्टमा ‘एआइभी पोजिटिभ’ रिपोर्ट देखिएको थियो । सो रिपोर्ट कुनै रोगको लक्षण हो भन्ने थाहा पाएपछि थप परीक्षणको लागि काठमाडौ पठाउनुपर्ने थियो तर उनिहरुले पठाइदिएनन्, लामिछानेले दुःखेसो गरे । मैले पटक– पटक काठमाडौको रिपोर्ट नआएको गुनासो गरेपनि सुनुवाई भएन उनले भने । त्यसको लगत्तै उनले पुनः चैत्र २० गते भरतपुरमा नै कुखुरा परीक्षणको लागि स्याम्पल लिएर गएको बताए । त्यतिबेलासम्म खोरमा करिव १ हजार ५ सय कुखुरा मरिसकेको लामिछानेको भनाई छ । दोस्रो पटकको रिपोर्टमा पनि पहिलो जस्तै पोजिटिभ रिपोर्ट आएपछि बल्ल परीक्षणको लागि जिल्लाबाट स्याम्पल काठमाडौ पठाइएको उनले वताए । जिल्ला पशुसेवा कार्यालयको व्यवस्थाका कारण समस्या झन विकराल बनेको उनको आरोप छ ।
अण्डा दिन थालेको ३ महिनामा रोगको प्रकोप

लोमेन जातको लेयर्स कुखुराले अण्डा दिन थालेको ३ महिना भएको थियो । ५ हजार १ सय कुखुरा मध्ये ९९ प्रतिशत कुखुराबाट अण्डा उत्पादन भईरहेकोमा अचानक रोग लागेपछि अहिले फर्म सञ्चालकलाई कुखुरा गाड्ने ठाउँको समेत अभाव भएको छ । उनको ५ सय कुखुरा अट्ने २ वटा खोरका सबै कुखुरा मरेर खोर खाली भएको छ । २ हजार अट्ने अर्को ठूलो खोरमा करिब ३ सय जिउँदा कुखुरा देख्न सकिन्छ भने सो खोरमा मरेका कुखुराहरुको थुप्रो लगाएर राखिएको छ । अर्को २ हजार १ सय कुखुरा हालेको खोरमा १ हजार १ सय कुखुरा जिउँदा छन् भने मरेका कुखुराहरुको थुप्रो र ठाउँ–ठाउँमा खोरभित्रै ढलेको र ढल्दै गरेको कुखुरा देखिन्छ । फर्म सञ्चालक लामिछानेका अनुसार अब करिव १ हजार ४ सय कुखुरा जिउँदा भएपनि २ दिनभित्रमा सबै कुखुरा सकिने अवस्थामा छ । कृषि विकास बैंक भरतपुर शाखाबाट ४७ लाख रुपैया ऋण लिई कुखुरापालन गर्दै आएका लामिछाने परिवारले अब कसरी ऋण तिर्ने भन्ने चिन्तामा छ । सामान्यतया प्रति कुखुरा ८ सयको दरले पनि करिव ४० लाख रुपैया भन्दा बढी क्षति भएको लामिछानेले वताए ।

बर्ड फ्लूको आशंकामा परिवारले घर छाडे

१ हप्तादेखि कुखुरा मर्न थालेपछि लामिछाने परिवारका ५ जना बसाई सरेका छन् । उनिहरु रत्ननगरको टाँडी क्षेत्रमा बस्न थालेका छन् । उनीहरु विगत ४ दिनदेखि माधवपुरको घर छाडेर गएका हुन् ।

मरेका कुखुरा गाँड्न भ्याइनभ्याई

फर्मका सञ्चालक अमृत लामिछानेले मरेका कुखुरा गाँड्न थालेको करिव १ हप्ता भयो । विगत ३ दिनदेखि धेरै मात्रामा कुखुरा मर्न थालेपछि उनले बिहानदेखि बेलुकासम्म खेताला समेत लगाएर कुखुरा गाडेका छन् । उनले शुरुमा खाल्डो खनेर ४ सय कुखुरा गाडेका थिए भने १८ गते पुनः २ वटा खाल्डो खनेर करिव ७/७ सय कुखुरा गाडेका थिए । त्यसपछि कुखुरा झन् मर्ने क्रम बढेपछि २१ गते ठूलो खाडल खनेर १ हजार ३ सय कुखुरा एकैठाउँमा पुरेको लामिछानेले वताए ।

मरेका कुखुराको ल्याव परीक्षण काठमाण्डौमा

२ पटकसम्म जिल्ला पशु सेवा कार्यालय चितवनमा परीक्षण गरिएको रिपोर्टबाट कुखुरामा ‘एआइभी पोजिटिभ’ देखिएको थियो । ‘एआइभी पोजिटिभ’ देखिएपछि काठमाडौ पठाइएको स्याम्पल छिटो ा परीक्षण गर्न पटक–पटक काठमाडौं स्थित कार्यालयका प्रमुख डिकरदेव भट्टलाई पटक–पटक फोन गरेको सञ्चालक द्रोण प्रसाद लामिछानेले बताए । “आजपनि धेरैपटके फोन गरे उनले भने,३ बजे दिउसो आउने भनेको रिपोर्ट अझै आएको छैन् ।”

About Editor Hamrofm

Check Also

चितवनमा पाँचौ राष्ट्रिय औद्योगिक प्रदर्शनीको तयारी तीव्र, ७५ प्रतिशत तयारी सकियो

चितवन,चैत १८- चितवनमा चैत २३ गतेदेखि २७ गतेसम्म पाँचौ राष्ट्रिय औद्योगिक प्रदर्शनी हुने भएको छ । …

Leave a Reply

Your email address will not be published. Required fields are marked *